Mohatag og pinansyal nga ganti ang kagamhanan sa Lalawigan sa Sugbo alang sa mga mananaog sa Cebu Provincial Meet nga gisugdan sa Dominggo, Pebrero 9, 2025 sa Dakbayan sa Naga.
Kini maoy gipahibalo ni Cebu Governor Gwendolyn Garcia atol sa opening ceremony sa unom ka mga adlaw nga kompetisyon.
Matod ni Garcia nga adunay giandam ang kagamhanan nga P50,000 nga ganti alang sa first-place winners, P40,000 sa second placers ug P30,000 sa third placers.
Makadawat sab og tag P20,000 nga ganti ang first placers sa cultural events, P10,000 sa second placers, ug P5,000 sa third placers.
“May I remind you, sangka ug paugnat man gyud ni sa kusog: be humble in victory and gracious in defeat. Nasayod tang tanan, whether you will come out the victors or the losers, you have done your very best, and for me, that is enough for the Province of Cebu,” matod ni Garcia.
Sa nasayran, moabot sa 10,494 ka mga atleta gikan sa 44 ka mga munisipalidad ang magsangka ning tuiga.
Sa kinatibuk-an, moabot sa 16,358 ka mga personalidad ang maglangkob sa tanang mga delegasyon lakip na niini ang 2,487 ka coaches ug chaperones, 755 ka technical officials, ug 2,280 ka support personnels.
Moabot sa 24 ka sports categories ug 10 ka cultural events ang kombatihan sa kompetisyon nga ipahigayon usab sa lungsod sa Minglanilla, San Fernando, ug Dakbayan sa Carcar.
Gilauman nga morepresentar sa Central Visayas Regional Athletic Association (CVIRAA) ang mga mananaog sa Cebu Provincial Meet. / ANV