Tungod sa kabalaka bahin sa sobra nga pagpahimulos sa mga kahinguhaan sa kadagatan, si Cebu City Mayor Raymond Alvin Garcia nagtukod sa Cebu City Protected Reef nga nahimutang tupad sa South Road Properties, daplin sa Mactan Channel.
Ang pagtukod niini, nga pormal nga gipatuman pinaagi sa Executive Order (EO) 15, series of 2025, nagtumong sa pagkonserbar sa kinabuhi sa dagat, pagpahiuli sa populasyon sa isda, ug pagpanalipod sa biodiversity.
Ang Cebu City Environment and Natural Resources Office (Cenro) ug ang Bantay Dagat Commission maoy gitahasan sa pagdumala sa maong proyekto.
Ang Bantay Dagat Commission adunay pipila ka mga importante’ng responsibilidad sulod sa Cebu City Protected Reef.
Kini naglakip sa pagpatuman sa Republic Act 8550, nga nailhan usab nga Philippine Fisheries Code, aron mapugngan ang pagsulod sa dili awtorisado nga indibidwal, ug pagpalambo sa mga programa ug pagkonserbar sa mga kahinguhaan sa bahura.
Dugang pa, ang Bantay Dagat adunay katungod sa pag-endorso sa mga nakalapas sa EO ngadto sa City Legal Office alang sa pagpasaka sa tukma’ng kaso.
Ang EO naglatid sa pipila ka mga gidili sulod sa protektadong bahura: Ang pag-apil sa bisan unsang kalihokan sa pagpanagat nga walay pagtugot sa kagamhanan sa dakbayan o mopahimulos, mo-okupar, moproduce, mopaanak, o mougmad sa bisan unsang matang sa isda o magtukod og mga fish corals, traps, pens, cages, o fishponds nga walay permiso gikan sa city hall.
Ang mga nakalapas sa EO 15 mag-atubang sa katugbang nga mga silot:
Ipahamtang ang multa nga P1,000 sa unang paglapas, P2,000 sa ikaduhang paglapas, ug P3,000, uban ang pagkanselar sa ilang lisensya ug pagkabilanggo, sa ikatulo nga paglapas.
Alang sa mga dili awtorisado nga pagpanagat nga naglambigit sa komersyal nga mga sakayan sa pangisda, ang mga silot mas taas.
Ang kapitan sa barko, ang tulo ka labing taas nga ranggo nga mga opisyal sa barko, ug ang tag-iya sa barko pamultahon og P50,000 hangtod P100,000 alang sa gagmay nga commercial vessel.
Ang mga medium-scale commercial fishing mahimo’ng mapahamtangan og multa nga gikan sa P150,000 hangtod P500,000, samtang ang large-scale commercial fishing adunay multa nga P1 million hangtod P5 million.
Dugang pa niini nga mga multa, ipahamtang ang administrative fine nga katumbas sa lima ka pilo sa balor sa nakuha nga isda. Gitakda usab sa EO nga ang mga nakuha nga isda ug mga gamit sa pagpanagat nga gigamit sa dili awtorisado nga mga kalihokan sa pagpanagat sulod sa protektadong bahura pagasakmiton. / JPS