Ipaimbistigar ni Cebu City Mayor Raymond Alvin Garcia sa National Bureau of Investigation kon kinsa ang reponsabli sa pagpakatap sa text scam nga naglambigit sa iyang ngalan.
Nidangop sa social media si Garcia lapas na sa kaadlawon sa Mayo 12, 2025 nga nagpasidaan sa publiko labot sa “black propaganda” batok niya.
Ang text blast nga gipakatap naghatag og mando sa mga nakadawat sa mensahe nga moderetso sa barangay hall aron kuhaon ang iyang P5,000.
Si Garcia nga nahinabi sa mga sakop sa media human makabotar, nagkanayon nga padulong na unta siyang matulog dihang nakadawat siya og 10 ka mga mensahe ug lima ka tawag gikan sa wa mailhi nga mga numero nga nangutana kon asa’ng barangaya.
Matod ni Garcia nga iyang ipasusi sa NBI kining maong isyu nga gihulagway niyang hugaw nga propaganda.
“Dako kaayo na nga bakak. And that’s not even my number,” matod ni Garcia.
Way gibasol si Garcia kay giisip niyang kabahin kini sa duwa sa politika apan iyang gihulagway nga nanobra ra.
Iyang gisubli ang panawagan alang sa makiangayon,matinud-anon ug hapsay nga eleksyon. / JJL / JPS