Gisugdan na ni Cebu Governor Gwendolyn Garcia ang pakighinabi sa potential nga mga investor alang sa himuong water and waste-to-energy (WTE) projects sa Kagamhanan sa Probinsya sa Sugbo.
Si Garcia nakigtagbo kang Farchad Kaviani, managing director for Southeast Asia alang sa Suez Group, usa ka kompaniya nga nabase sa Paris, France.
Ang maong grupo adunay kahimoan sa water and waste management solutions.
Sa nasayran nga dugay na nga plano sa Kapitolyo ang pagpatuman sa WTE project, apan padayon kining nangita og mga mahimo’ng partner aron paghatag og katumanan sa maong plano.
Gawas niini, nisulod usab kini sa usa ka multi-billion bulk water infrastructure project sa di momenos 25 ka mga lokalidad sa probinsya nga kasamtangang gipangitaan og pribadong grupo nga maoy mo-manage sa bulk water projects.
Sa umaabot, gilauman ang paglagda sa Kapitolyo og kasabutan tali sa Spain-based firm nga Acciona Energia alang sa pagtukod sa 150-megawatt solar power plant sa lungsod sa Daanbantayan. / ANV