Gisalikway ni Mayor Raymond Alvin Garcia ang mga pasangil nga namolitika sila sa pagpanghatag og cash assistance sa pipila ka mga barangay sa Dakbayan sa Sugbo samtang nagsingabot ang eleksyon.
Matod ni Garcia sa Lunes, Marso 24, 2025, nga 61 sa 80 ka barangay ang nakadawat og tag P5 million cash assistance gikan sa kagamhanan sa dakbayan.
Apan iyang gipanghimakak nga duna siyay gipaburan nga mga barangay ilabi na sa klarong nisuporta sa iyang kandidatura sa pagka mayor sa 2025 elections.
“No playing favorites gyud ning akoa. Ang atong gipanghatagan walay pili even candidates nga naa sa pikas nidagan. Kay moingon na sad na sila nga namolitika ta,” matod ni Garcia atol sa press conference sa City Hall.
Gitataw ni Garcia nga ang mga kapitan kinahanglan nga moproseso sa ilang mga project proposal ug mohatag og utilization reports sa niaging financial assistance nga nadawat sa dili pa ang Marso 28, nga maoy sugod sa election ban sa fund disbursements.
Gipahinumdoman ni Garcia ang mga kapitan nga ang kagamitan sa cash assistance dili para sa mga empleyado sa barangay.
Ang P5 milyunes gitagana alang sa infrastructures ug barangay projects.
Matod sa mayor nga ang kagamhanan nigahin og P400 milyunes gikan sa 2025 General Funds isip financial assistance matag barangay.
Ang pundo alang sa barangay projects ug community programs.
Gawas sa cash assistnce, gipanghimakak sab ni Garcia nga dunay pamolitika sa pagpanghatag sa bugas.
Atol sa session niadtong Marso 19, sila si Konsehal Jocelyn Pesquera ug Mary Ann de los Santos nikuwestyon sa legalidad sa pagpanghatag og bugas sa Barangay Duljo-Fatima ug Quiot Pardo.
Ilang gitumbok nga ang purchase order sa bugas gikan sa Local Disaster Risk
Reduction and Management (LDRRM) Fund nga alang sa relief operations atol sa deklarasyon sa state of calamity.
Gipasabot ni Garcia nga ang gipanghatag nga bugas gikan sa Department of Social Welfare and Services ubos sa ilang social preparedness ug di sa LDRRM.
Sila si Pesquera ug de los Santos nipasangil sab nga dunay video footage nga nagpakita ngamga tawong nalambigit sa pagpanghatag og bugas nagsul-ob og t-shirts nga dunay ngalan ni Garcia ug sa political party nga Kusug.
Matod ni Garcia nga lisod ang pag-ila sa mga empleyado sa City Hall nga nitabang sa pagpanghatag uban sa mga volunteer ug supporters.
Sigon ni Garcia nga kon ipadayon sa duha ka konsehal ang pagreklamo mas maayo nga ilhon kinsa kadtong mga empleyado ug mga volunteer.
“Let them name names because it’s so difficult to distinguish employees from volunteers and supporters. Check your mouth before you open it. I mean dili nato ipatigbabawbaw ang atoang political interest,” matod niya. / JPS