Suportado ni outgoing Cebu City Mayor Raymond Alvin Garcia ang plano sa umaabot nga bag-ong administrasyon sa nga himuong 24/7 ang mga serbisyo sa City Hall .
Apan nisugyot si Garcia ngadto ni mayor-elect Nestor Archival nga sagupon ang digital application nga mas epiktibong pamaagi kaysa bukas nga mga opisina sa gabii.
Gipaambit ni Garcia ang iyang sugyot tungod kay atol sa iyang usa ka tuig nga pagka mayor, iya sab nga giplano ang “sleepless” City Hall, apan lahi ang iyang pamaagi.
“I wish it well. But during the one year nga naglingkod ko, we also looked at this possibility and we looked at it in a way to provide the services needed but not necessarily opening offices in the evening,” matod ni Garcia .
Iyang gisugyot ang ideya nga gamiton ang technology, ug ipaagi ang tanang transaksyon sa digital application ug tawgon kini og “Cebutizen.”
“It should have been through the app na unta, mga techy na baya ta unta,” nagkanayon si Garcia.
Nagtuo si Garcia nga pinaagi sa digital approach makadaginot ang siyudad sa elektrisidad ug sa manpower.
“As a result, you save on electric costs, manpower costs, that has already been the plan,” dugang niya.
Gitataw sa mayor nga wala lang gyud matuman ang iyang plano tungod sa kamubo ra sa panahon nga naghupot siya sa posisyon.
“Wala lang gyud ta ka-move forward sa app kay one year ra baya ko. But, ako, I’m very supportive of the new administration,” ingon ni Garcia.
Samtang suportado niya ang tinguha nga 24/7, si Garcia nanghinaot nga sagupon sa umaabot bag-ong administrasyon ang paggamit sa digital app nga iyang nasugdan.
“Let it be, I’m still supportive of this plan. But, maybe in the future, continue what I’ve started kaning paghimo og app,” dugang niya.
Subay niini, malaumon ang mayor nga suportahan sab sa ubang mga ahensiya sa gobiyerno sama sa Bureau of Internal Revenue (BIR), Social Security System (SSS), ug Pag-IBIG Fund, ug uban pa ang plano sa sunod administrasyon kay gikinahanglan ang ilang pagtambayayong sa 24/7 services sa Cebu City Hall. / JPS