Niabot na sa duha ka kilometro ang underground cable installation project sa South Road Properties (SRP) sa Dakbayan sa Sugbo nga nagpakita og 300 porsiyento nga pagtaas gikan sa 500 metros nga gitaho sa miaging semana.
Ang maong kalambuan gianunsyo ni Mayor Raymond Alvin Garcia pinaagi sa Facebook post niadtong Sabado, Mayo 3.
Ang proyekto gilusad niadtong Marso subay sa City Ordinance 2750 nga nagmando sa pagbutang og mga utility, power, television, ug telecommunications cables ilawom sa yuta sulod sa hurisdiksyon sa siyudad.
Ang pilot project naglangkob sa duha ka lugar: ang SRP ug ang heritage district.
Sa SRP, ang trabaho himuon sa duha ka hugna nga naglangkob sa kinatibuk-an nga 22 ka kilometro.
Sa heritage district, ang mga kable ilubong sa ilawom sa yuta sa palibot sa Plaza Sugbu, City Hall, ug Basilica Minore del Sto. Niño. Ang downtown area maoy gihatagan og prayoridad tungod sa pagkaylap sa mga overhead wire.
Si Konsehal Jerry Guardo, chairperson sa komite sa imprastraktura sa Sangguniang Panlungsod, niingon nga posibleng malangan ang pag-instalar sa heritage district tungod sa gikinahanglang mga permit.
Ang pilot project nga nagsugod niadtong Marso 3 ug sa sinugdanan gipaabot nga mahuman sa katapusan sa Abril, sumala ni Neil Bongon, direktor sa planning department sa project contractor nga Fibernet Konstrukt Corp.
Matod ni Guardo, ang pilot initiative magsilbi nga pruweba sa konsepto.
Kon magmalampuson, molapad ang proyekto ngadto sa ubang dagkong karsada sa dakbayan, lakip na ang Natalio Bacalso Avenue, Osmeña Boulevard hangtod sa Talamban, ug P. del Rosario St. hangtod sa M.J. Cuenco Avenue sa Mabolo.
Si Guardo, kinsa nagsilbi sa iyang katapusang termino isip konsehal, sa sayo pa, niingon nga iyang ipasa ang pagdumala sa proyekto ngadto kang Konsehal Edgardo Labella II, chairperson sa committee on Information, Communications and Technology. / JPS