Gihangop ni Cebu Gobernador Gwendolyn Garcia ang sugyot sa Department of Energy (DOE) nga ipadayon ang oil and gas exploration ug drilling sa Barangay Montpeller, lungsod sa Alegria, habagatang-kasadpan sa Sugbo.
Hinuon, gisugyot sa gobernador nga ipadayon kini.
Atol sa tigom sa Kapitolyo sa Huwebes, Marso 14, 2024, gisubli sa DOE ang tinguha niini nga ipahigayon ang exploration ug drilling sa lungsod.
Si Garcia niingon nga gusto niyang abi-abihon ang mga pribadong kompaniya ug tugotan sila nga makigtambayayong sa Kapitolyo sa pagpadayon sa drilling ug exploratory activities nga gitumong sa pagkuha sa wala pa matuki nga gas ug oil reserves sa lungsod.
“Among giimbitar ang mga pribadong kompaniya ug tugotan sila nga makigtambayayong sa Kapitolyo sa pagpadayon sa mga paningkamot sa eksplorasyon ug pag-drill aron magamit ang mga kahinguhaan sa lana ug gas sa lungsod,” matod ni Garcia.
Ang DOE, matod sa Kapitolyo, uyon sa sugyot sa gobernador ug mosuporta sa negosasyon sa mga kompaniya nga interesadong makig-alayon kanila sa oil exploration.
Kahinumdoman, ang kontraktor nga China International Mining Petroleum Co. Ltd. (CIMP) nakakuha kaniadto og komersyal nga gidaghanon sa natural nga gas ug lana sa maong dapit.
Gibanabanang pagkadiskobre sa 27.93 milyon nga baril sa lana nga dunay potensyal nga pagbawi sa produksiyon nga 3.35 milyon nga baril sa krudo o konserbatibong pagbanabana nga 12 porsyento sa tanan nga lana sa lugar ug mga reserba. / ANV