Sama sa usa ka valedictory address sa dili pa ang Hunyo 30, 2025 gipasalig ni Gobernador Gwendolyn Garcia nga magpadayon ang iyang mga gisugdan programa bisan og bag-o na ang liderato sa Lalawigan sa Sugbo.
“This feels like a graduation,” matod ni Garcia atol sa RCebu Expo sa “Spectacular Sugboanon” niadtong Hunyo 21, 2025, nga nihulagway sa pagtapos sa iyang termino nga sama sa usa ka commencement nga nagpasabot og panapos ug bag-ong mga sinugdanan.
Ang RCebu Expo nagpakita sa nagkalain-laing produkto gikan sa mga lungsod ug siyudad sa Third ug Fifth District sa Cebu didto sa Robinsons Galleria, Cebu City gikan Hunyo 21-23, 2025.
“Public office is a public trust. Ang tingog sa katawhan mao ang tingog sa Ginoo,” dugang ni Garcia.
Matod niya nga pagka-Hunyo 30, “ordinaryo na ta nga mga lumulupyo,” nagpasabot og pagbalik sa pribadong kinabuhi—apan nagpasabot gihapon og padayon nga pagkalambigit sa mga kalihokan sa publiko.
Dugang niya, human sa iyang 20 ka tuig nga pagserbisyo sukad 2004, aduna na siyay panahon aron unahon ang iyang kaugalingon.
Mahitungod sa kontrobersyal nga trust funds nga gigamit sa pagpundo sa pipila ka dagkong programa sa probinsya, gipasabot ni Garcia ang legalidad ug katuyoan niini.
“These programs were carried out in accordance with the law. They have been benchmarked by other provinces, and with the full support of the Provincial Board, we put in necessary protections,” matod niya.
Samtang gikuwestiyon sa mga kritiko ang legal nga basehan sa maong mga trust funds, gihagit ni Garcia ang maong mga pagduhaduha, nga gihulagway kini nga “kasaba” ug “tingali walay alamag o ignorante.”
“Ato kining ipadayon—subay sa balaod, ug labaw sa kasaba,” matod niya. “Ang Cebu kinahanglan ug magpadayon. Giunsa? Tan-awa ko.”
Gihisgotan usab ni Garcia ang posibilidad nga gamiton ang Robinsons Galleria alang sa umaabot nga kalihukan, nagpasabot og tinguha sa padayon nga pagkalambigit. “Unta maka-accommodate pa ang Robinsons Galleria nato,” matod pa ni Garcia.
Gitapos ni Garcia ang iyang mensahe sa pagpaubos, “Wala nako gi-angkon ang Sugbo. It is owned by Cebuanos.” (EHP)