Usa ka mag-uuma nga nagtanom og siling espada ug paliya naigo sa fall armyworms hinungdan sa pagkadaut sa iyang mga tanom.
Mao kini ang gibutyag ni Pino Oyangoren Caminade, lumad nga taga Brgy. Alambijud, bukiran sa lungsod sa Argao apan tua mag-uma sa Brgy. Manatad, bukiran sa lungsod sa Sibonga, habagatang Sugbo.
Si Caminade, nga gikahinabi sa Superbalita Cebu, nagkanayon nga 6,000 ka mga punoan ang iyang gitanom nga sili’ng espada apan ang mga bunga giataki o gikaon sa fall armyworms.
Dason niya, nangabuslot buslot ug nangatagak gikan sa mga punoan ang mga sili.
Matod ni Caminade nga nasurprisa siya kay nagtuo siya nga ang mga bunga ra sa mais ang kaunon sa mga armyworm, apan lakip na diay ang siling espada, paliya ug dahon sa saging.
Matod niya nga niadtong Huwebes sa hapon, Hulyo 18, 2024, iyang gibumbahan og chemicals nga pangpatay sa mga ulod.
Apan igo ra kining nalipong mao nga nangita siya og laing chemicals nga ibomba sa mga fall armyworm.
Si Caminade niingon nga ang iyang siling espada mga siyam na kini ka bulan ug iya nang gisigihan og harvest ang mga bunga ug gibaligya.
Matod niya nga dako’g danyos ang namugna sa armyworms sa iyang mga tanom apan wa siyay kwentada kon pila ang kantidad.
Gihulagway niya nga kon pamuniton ang tanang armyworms sa iyang garden lang, kuwang ang usa ka baldi sa kadaghan.
Iya usab nga susihon ang ubang mga mag-uuma sa Manatad, Sibonga kon ang ilang kamaisan ug mga saha sa saging ug uban pang mga tanom giatake ba sa mga armyworms. / DVG