WALA mosumbong si Police Colonel Royina Garma kang Presidente Rodrigo Duterte labot sa padayon nga pagpangatake ni Cebu City Mayor Tomas Osmeña kaniya ug sa kapulisan sa Dakbayan sa Sugbo.
Matod ni Colonel Garma nga niadto siya sa Malacañang aron iyang ipa ila-ila ang usa ka babaying pulis nga mahimong aid ni President Duterte.
Wala matod pa sila magdugay sa paghinabi sa presidente sanglit nagdali kini alang sa cabinet meeting gahapon diin igo lang sila nagtagbo sa gawas sa usa ka hall sa Malacañang.
"Honestly, it has nothing to do with our mayor. Naghanap siya ng aid, sinamahan ko lang yung isa kong personnel. In-introduce ko lang. 'Yan ang pinaka totoo. Pinadala sa akin yung aid para makita nya , para ma approve nya kasi he needs another aid pa. Yun lang ang purpose. Wala na. Andaming nag-speculate." Matod ni Colonel Garma.
Giangkon niya nga kon gipangutana pa siya sa presidente, andam niya kining tug-anan sa tanan.
Gipasalig niya nga ning nagkaduol na ang eleksyon pabilin nga neutral ang kapulisan sa Siyudad sa Sugbo ug gitinguha nila nga mahimong hapsay ug malinawon ang piniliay.
Una nang mireklamo si Mayor Osmeña nga gigamit sa politika ang kapulisan sa Siyudad sa Sugbo gani aduna'y mga gipangbulgar ang mayor sa Facebook page niini nga magpamatuod nga ang pulis nagamit gyud sa politika.
Hugot kining gihimakak ni Colonel Garma kay nagpabilin nga neutral ang kapulisan sa dakbayan.
Matod niya nga aduna'y mga pulis nga nagtug-an niya nga niadtong 2013 midterm election gipanggamit matod pa usab sa partido ni Osmeña ang kapulisan.
Samtang, wala na usab mokagat si Police Colonel Royina Garma sa laing post ni Mayor Tomas Osmeña nga nagpakita sa CCTV footage sa balay ni Barangay Calamba kapitan Jojo Quijano diin giingong mga sakop sa Special Weapons and Tactics team ang mipugos sa pagsulod sa balay niini.
Matod ni Garma nga kom aduna'y ipasaka nga kaso ang mayor sa kapulisan sa korte nalang nila kini tubagon.
"Kung gusto niya ifile nya yan. Kung anong allegation nya, sagutin na lang namin kung may subpoena na," matod ni Colonel Garma.