Gi-salvage milutaw sa kadagatan sa Talisay

Gi-salvage milutaw sa kadagatan sa Talisay
(Tampo nga hulagway)

LALAKI nga patay nga napalgan nga naglutaw sa kadagatan sa Barangay Cansojong ug Poblacion, Siyudad sa Talisay sa Lunes sa udto, Hunyo 17, 2024, wa pa mailhi hangtod ning pagsuwat.

Gihulagway sa kapulisan nga ang baba sa biktima gibaatan og masking tape ug gibinaklid sa paggapos ang mga kamot, naka-sleeveless og stripe shirt ug itom ang karsones.

Gibana-banang anaa kini sa pangidaron nga 40 pataas, ug 5’4 ang gitas-on.

Ang lawas gidala sa usa ka punerarya sa Siyudad sa Sugbo, apan hangtod ning pagsuwat, ang kapulisan sa Talisay nagkanayon nga wala pay ni-claim nga tagtungod niini.

Sa imbestigasyon sa kapulisan ubos sa direktiba sa ilang hepe nga si Police Lieutenant Colonel Epream Paguyod, ang mga mananagat ug mga tripulante sa nakaangkurahing barko sa dapit ang nakakita sa lawas nga naglutaw 500 ngadto sa 700 meters nga gilay-on gikan sa baybayon.

Ang mga sakop sa Bantay Dagat ug Philippine Coast Guard (PCG) mao ang ningkuha sa lawas pinaagi sa pagbira niini ngadto sa baybayon.

Sa paghiling sa kapulisan, way nakita nga samad pinusilan o dinunggaban sa lawas hinungdan nga girekomendar nga ipaubos kini sa autopsy kon ma-claim na sa iyang kabanay.

Nagduda ang kapulisan nga dili kini taga dakbayan sa Tali­say kay way ni-report sa ilang buhatan nga dunay missing person.

Nag-awhag ang kapulisan sa publiko, labina kon dunay nawala sa ilang pamilya, sa pagduol sa Talisay City Police Office aron masuta kon di ba sakop sa ilang pamilya ug makuyogan ngadto sa punerarya. (DVG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph