Gipasakahan na og kasong frustrated murder ang mga responsabli sa pagpusil sa usa ka babaye nga nagdula lang og scatter daplin sa karsada sa P. Gullas Street, Tabu sa Banay, Barangay Santo Niño, Siyudad sa Sugbo alas 3:10 sa kaadlawon, Hunyo 18, 2025.
Matod ni Police Lieutenant Colonel Maria Theresa Macatangay, deputy city director for operation sa Cebu City Police Office (CCPO), nga human nadakpan sa Waterfront Police Station ang usa sa mga spotter nga babaye niadtong Hunyo 20, 2025, ilang nailhan ang riding in tandem nga nagpusil kang alyas Chrishia, 32, nga taga Sitio Bato, Barangay Ermita.
Ang nadakpan sa kapulisan giila sa alyas nga Jane, 41, taga Barangay Kamputhaw nga gitumbok nga maoy spotter sa mga namusil.
Atol sa gihimong imbestigasyon, nitug-an ang dinakpan kon kinsa ang naghimo sa krimen.
Drugas ang usa sa mga hinungdan maong gipusil ang biktima tungod kay wala ni naka-remit sa halin sa ilegal nga drugas nga gikasuko sa mga responsabli sa krimen.
Ang spotter nga unang nadakpan sa kapulisan giingong kauban ra sab sa biktima nga mamaligyaay og shabu diha sa maong dapit.
Basi sa pamahayag sa nga saksi nga si alyas Jane maoy nag-guide sa gunman nga si alyas “Tata Tirador” kon asa naglingkod ang biktima ug dayong pusil makaduha kahigayon.
“Basi sa iyang revelation as well as sa statements pud sa nakaila sa victim, ang involvement gyud sa ilegal nga druga tungod kay kini kuno nga biktima naay mga unremitted amount sa sales sa illegal drugs,” matod ni Macatangay.
Naa na sa luwas nga kahimtang si Chrisha bisan pa man nga naigo ni sa iyang walang aping ug tapsing sa iyang ulo.
Wala lang una nganli ni Macatangay kon kinsa ang mga gipangkiha sa CCPO ngadto sa korte.
Kon mogawas na ang warrant of arrest sa namusil , pangitaon siya sa kapulisan. / AYB