Lalaki giatsa sa kapuyo sa iyang maguwang tungod lang sa wifi sa alas 3 sa hapon niadtong Dominggo, Abril 14, 2024 sa Purok 7, Brgy. Bagacay, dakbayan sa Toledo.
Ang biktima giila nga si Raul Fabroa Segarra, 40, dunay kapuyo, samdan sa walang ilok ug buko-buko samtang gisikop si Ramil Plato, 48, kapuyo sa maguwang sa biktima.
Si Police Senior Master Sgt. Ramonito Canasa, imbestigador sa Toledo City Police Station, nitug-an nga nagkalalis ang biktima ug suspek.
Ang biktima nakadungog sa lalis sa iyang maguwang nga babaye ug suspek, tungod kay wa makauyon sa gipalit nga wifi router.
Kay wala nakauyon, ang suspek ug igsuon sa biktima nagkalalis. Tungod niini, gisulong ni Segarra ang balay sa suspek nga iya ra sab nga silingan.
“Unsa diay problema nimo sa wifi, Bro? Nitubag ang suspek dugay na kong naglagot nimo, tagod-taguron niya tika,” asoy sa biktima nga nikutlo sa suspek ngadto sa polis.
Nibalik sa agi ang biktima, niadto sa likod sa balay aron pagkuha sa iyang pana.
Wala siya nakabantay nga nisunod ang suspek nga nagdala og atsa dayong tigbas sa biktima, kinsa naigo sa may ibabaw sa walang ilok.
Bisan kon samaran, nakahigayon siya og pana sa suspek nga naigo sa dughan, apan kay habulan ang uhas, niuntol lang kini sa dughan sa suspek.
Giusban sa pagtigbas sa atsa ang biktima, kinsa nakadagan bisan samaron na. Kasong frustrated homicide ang gipasaka sa kapulisan batok sa suspek. / GPL