Usa ka batan-ong Sugbuanon ang gi-hike ang tibuok isla sa Sugbo sulod sa 15 ka adlaw diin mitala kini og 357.66 kilometros nga datus sa iyahang Strava.
Ang Strava, usa ka app nga gigamit karon sa mga runners, cyclists, ug bisan hikers, aron matala ang gilay-on sa ilahang pagdagan, pagbisikleta, o pagtungas sa bukid.
Trending kini karon hilabi na nga daghan na usab sa mga Pinoy ang anaa sa healthy lifestyle pinaagi sa pagdagan ug pag-post sa ilang record online gamit ang maong tracking app.
Usa ang batan-on nga si Kevin Maglinte, 31, nga taga Talamban, Dakbayan sa Sugbo nga gilakaw ang tibuok Sugbo gikan sa Lungsod sa Daanbantayan paingon sa Santander.
Uwahing bahin sa Hunyo ug sayong mga semana ning Hulyo dihang nag-inusara nga gisuwayan ni Maglinte ang paghimo og laing adventure alang sa iyang hiking journey.
Sa unang adlaw, nahimo pa niini nga sugdan ang hike sa bukirang bahin sa mga lungsod sa Sugbo diin miabot gyud siya og 40 kilometros.
“Ang pinaka-worst nako naabot kay alas 9 sa gabii, katong first day, kay gi-overestimate man nako akong kaugalingon. Niya layo kaayos tanan,” asoy ni Maglinte sa Superbalita Cebu.
MGA PAGSUWAY
Dala ang iyahang 15 ka kilos nga backpack, gisaysay ni Maglinte ang mga hagit nga iyang nasinati gawas sa uwan ug sa mga dapit nga iyang naagian.
“Iro, grabe mangukod ang mga iro didto sa North. Gukdon ka, hapit ko napaakan,” saysay sa batan-ong content creator.
Laing kasinatian niya nga dili niya makalimtan nga daw giungo sa usa ka linaw o lake sa Lungsod sa Pinamungahan.
“Abi nako'g daghan mag-camp didto kay Friday man to. Kaon ko, pahuway nako, higda nako. Sus naa bita'y foot steps pero dili paspas. Abi nakog mga dahon ra or animals ra. Sus, kay naa may murag nibato sa akong tent,” sigun pa niya.
Hinuon, wala kini mihunong ug mipadayon sa iyang hike. Gikan sa pag-camp, pagtulog sa barangay hall, hangtod sa pag-book og mahalon nga resort, nahimo niya kini tungod kay wala na siyay choice.
“Para nako, ma-clear akong mind. I don't know if maka-relate ang uban but mura siyag form of meditation ba kay wa man gud kay hunahunaon or imoha ra ipa-let go imong utok nga maghunahuna ra og iyaha,” asoy ni Maglinte.
Tambag niini sa gusto nga mosuway niini nga kinahanglan ang ensakto nga training. Gawas niini, mo-invest sa sapatos nga pang-trekking gyud.
Pipila sa mga nasaka na ni Maglinte ang Mt. Guiting-Guiting sa Romblon, Mt. Apo sa Mindanao, Mt. Kalatungan sa Bukidnon, Mt. Pulag sa Benguet, Mt. Mantalingahan sa Palawan, ug Mt. Ijen sa Indonesia. / Hinatag nga mga hulagway