Gibuksan ang aplikasyon sa unconsolidated PUVs

Gibuksan na usab sa Land Transportation Franchising and Regulatory Board (LTFRB) ang mga aplikasyon alang sa unconsolidated public utility vehicles (PUV) hangtod sa Nobiyembre 29, 2024, matod ni LTFRB Chairperson Teofilo Guadiz III sa Huwebes, Oktubre 17, 2024.

Sa usa ka interbyu sa radyo, si Guadiz niingon nga ang mga unconsolidated PUVs gihatagan og kahigayonan nga makaapil sa mga kasamtangang kooperatiba sulod sa 45 ka adlaw, gikan sa Oktubre 15 ngadto sa Nobiyembre 29, ubos sa Public Transport Modernization Program (PTMP), kanhi nailhang Public Utility Vehicle Modernization Program (PUVMP).

Matod niya nga iyang gimando ang pag-abli pag-usab sa aplikasyon kalabot sa resolusyon nga giluwatan sa Senado nga naghangyo sa temporaryo'ng pagsuspenso sa pagpatuman sa PTMP, samtang naghulat sa resolusyon sa balido ug dinalian nga mga kabalaka nga gipadangat sa mga apektadong drayber ug operator.

Gitataw ni Guadiz nga ang mga unconsolidated PUV gitugotan lang sa pag-apil sa kasamtangan nga mga kooperatiba ug dili na tugotan nga magtukod og bag-ong mga grupo.

Iyang giawhag ang mga unconsolidated PUVs sa pag-apil sa modernization program sa gobyerno aron makadawat og mga benepisyo sama sa P10,000 alang sa fuel subsidy, ug P15,000 ngadto sa P20,000 alang sa service contracting sa Libreng Sakay program.

Sa Abril 30, ang pinakaulahing deadline nga gitakda sa Department of Transportation (DOTr) alang sa konsolidasyon sa mga PUVs, niabot na sa 36,217 ka units o gibanabana nga 19 porsiyento sa kinatibuk-ang jeepneys ug ubang PUVs ang wala pa ma-consolidated.

Ang unconsolidated PUVs gikonsiderar nga colorum bisan pa man nga gitugotan sila nga maka-operate sa dul-an sa 2,500 ka mga lugar sa tibuok nasod diin adunay ubos nga consolidation rate.

Ang PUVMP gipasiugdahan ubos sa administrasyon ni kanhi Presidente Rodrigo Duterte sa tinguha nga ilisan ang tradisyonal nga Filipino jeepneys og moderno ug environment-friendly nga mga sakyanan nga nagbutang sa taas nga konsiderasyon ug prayoridad sa kaluwasan sa nagsakay nga publiko.

Ubos sa PUVMP, ang mga PUV gikinahanglan nga mo-operate ubos sa usa ka kooperatiba alang sa pagbag-o sa ilang mga temporaryong awtoridad, usa sa labing gisaway nga probisyon sa programa. / TPM / SunStar Philippines