Gibunalan tungod sa selpon nga giprenda

Cebu City map.
Cebu City map.

Nasamad ang ulo sa habalhabal driver kay gibunalan sa tawo nga iyang gikalalis sa alas 7 sa buntag sa Biyernes, Mayo 10, 2024 sa M. Velez St., Brgy. Capitol Site, Dakbayan sa Sugbo.

Si Arman Sombelon, hingkod, dunay kapuyo, nagpuyo sa nahisgutang dapit, nakaangkon og dakong sa­mad sa likod sa ulo human naigo sa usa ka magahi’ng butang.

Mga residente sa dapit nitumbok sa suspek nga silingan nga si Arnel Abad, hingkod.

Usa ka ginganlan og “Linda” nga nahinabi sa Superbalita Cebu nibutyag nga gibunalan sa suspek ang biktima.

Wala nila makita kon unsay gigamit sa pagbunal sa ulo, apan sa wa pa ang hitabo, naglalis ang duha tungod sa selpon sa suspek nga giprenda niya sa biktima ug iya untang lukaton.

“Nangita ang suspek sa iyang selpon kay lukaton niya.Kining biktima sige’g unya-unya kay kuhaon pa daw niya, giprenda sa laing tawo,” dugang ni Linda.

Sa kalagot sa suspek, giingon nga iyang gibunalan ang biktima dayon nisibat ug wa na maabti sa mga polis.

Ang biktima nagsuka dihang gidala sa mga rescue personnel sa tambalanan.

Si Sunshine Martinito, 20, bayaw sa biktima, nibutyag nga ni-park sa motorsiklo ang bana sa iyang maguwang.

Nakugang na lang sila nga gipahibalo nga gibunalan kini ni Abad.

Ang ubang mga silingan nibutyag nga gisikaran sab sa suspek ang biktima.

Ang biktima nakakupot pa og botelya aron modepensa apan nahagba. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph