Gidepensahan ni Dumanjug Mayor Efren “Gungun”Gica ang construction firm nga QM builders bisan pa man sa nagkadaiyang reaksyon sa publiko human gibutyag ni Presidente Bongbong Marcos ang binilyong kantidad sa flood control projects sa nagkadaiyang lugar sa nasod.
Matod ni Gica, ang Lungsod sa Dumanjug maoy usa sa mga nakabenepisyo sa mga proyekto nga gipatuman sa QM Builders kinsa mao ang contractor nga ikaupat sa listahan sa 15 ka contractors nga gihinganlan ni President Ferdinand Marcos nga nakakuha sa binilyon ka pesos nga flood control projects.
Ang maong kompaniya nga nagbase sa Dumanjug kinsa gipanag-iya ni Engr. Allan Quirante.
Matod sa Mayor andam siya mohimo og resolusyon pagsuporta sa maong kompaniya.
Giklaro sab sa mayor nga walay ghost projects gumikan kay niagi kini sa saktong proseso pinaagi sa Bids and Awards Committee (BAC) nga striktong mosunod sa balaod sa procurement
law aron masiguro nga ang mga proyekto gi-award sa labing kwalipikado nga kontraktor.
Iyang gidugang nga gawas niini, pipila sab ka mga proyekto ang napatuman sa maong construction firm sa ilang lungsod nga nakahatag og benepisyo sa kadaghanan.
LISTAHAN
Samtang, si Cebu Governor Pamela Baricuatro niawhag ngadto sa Department of Public Works and Highways (DPWH) nga hatagan ang kapitolyo og kumpletong listahan sa mga flood control projects nga gipatuman sa Lalawigan sa Sugbo.
Matod sa gobernador nga sa dihang gibutyag ni Presidente Marcos ang mga binilyon nga kantidad sa mga flood control projects lukop nasod, dali siyang nangutana sa Provincial Engineering’s Office kon duna bay gipatuman nga susamang proyekto ang Kapitolyo.
Andam hinuon siya ug suportado sab ang bisan unsa nga imbestigasyon nga himuon sa gobiyerno kalabot sa maong mga proyekto.
“If there’s an investigation, then so be it, you know, maayo na mahibaw-an natong katag diri, kinsay nangurakot kani nga mga funds,” matod ni Baricuatro. / ANV