Giklaro sa Cebu City Veterinarian ang mikatap nga taho nga giingong moabot ngadto sa 15 ka mga barangay sa Dakbayan sa Sugbo ang adunay pagkuyanap sa African Swine Fever (ASF) ning tuiga.
Si Alice Utlang sa Department of Veterinary Medicine and Fisheries (DVMF) nitug-an sa SunStar Cebu niadtong Biyernes, Agusto 23, nga tulo lang ka barangay sa dakbayan ang adunay kompirmadong kaso sa ASF nga mao ang Babag, Bonbon, ug Pulangbato.
Gitataw hinuon ni Utlang nga kontrolado na ang pagkuyanap sa ASF sa maong mga barangay.
Sukwahi kini sa gipakatap nga memorandum gikan sa Talisay City Livestock and Poultry Center nga pinetsahan og Agusto 1, diin nakuhaan og kopya sa SunStar Cebu, nga adunay 15 ka barangay ang kompirmadong ASF.
Ang officer-in-charge sa Talisay City Veterinarian nga si Ma. Christine Hope Dejadena niingon nga ang Cebu City Barangay Tisa, Budlaan, Bulacao, Busay, Adlaon, Cambinocot, San Jose, Pit-os, Paril, Kalunasan, Pulangbato, Toong, Malubog, Mabini, ug Agsungot kompirmadong kaso sa ASF.
Si Utlang niingon nga sayop ang inpormasyon gikan sa Dakbayan sa Talisay tungod kay ang maong listahan nagtumbok sa 2023 nga nakumpirma ug gidudahang mga kaso sa ASF diin iyang giklaro nga nga walay gitaho o na-monitor nga mga kaso sa ASF sa kadaghanan niining mga barangay nga nahisgotan karong tuiga.
Gipasabot usab niya nga kung dili maklaro ang maong taho maghatag kini ug kalibog ug kalisang sa mga hog raisers sa bukirang barangay sa dakbayan.
Mahimo usab nga moresulta kini sa pagpahimulos sa mga negusyante og baboy sa sitwasyon ug pagpalit og buhi nga baboy gikan sa mga mag-uuma sa ubos nga presyo gikan sa naandan nga presyo sa farmgate, sigon pa ni Utlang.
Dugang pa niya nga ang DVMF nagpabilin sa ilang gihimo nga surveillance ug monitoring measures ug ang kanunay nga Information and Education drive sa mga mag-uuma sa baboy aron masumpo ang sakit./EHP