Nisaka og gamay ang unemployment rate sa nasod ngadto sa 4.1 porsiyento niadtong Abril 2025, gikan sa 3.9 porsyento niadtong Marso.
Sa usa ka report, ang Philippine Statistics Authority (PSA) nagkanayon nga sukad niadtong Abril 2025, moabot sa 50.74 ka milyon nga mga Pilipino nga nag-edad og 15 anyos pataas ang apil sa labor force.
Sa 50.74 ka milyon, 48.67 ka milyon o 95.9 porsiyento ang adunay trabaho. Mas ubos kini gamay sa employment rate sa Abril 2024 nga 96 porsiyento o 48.35 ka milyon.
Niadtong Enero 2025, ang employment rate gibanabana nga 95.7 porsiyento o 48.49 ka milyon nga mga tawo ang adunay trabaho.
Ang mga walay trabaho nikabat sa 2.06 ka milyon o 4.1 porsiyento sa labor force participation rate (LFPR).
Ang unemployment rate niadtong Abril 2024 kay 4.0 porsiyento o 2.04 ka milyon samtang 4.3 porsiyento niadtong Enero 2025 o 2.16 ka milyon nga mga Pilipino.
Sa average, ang mga empleyado nagtrabaho og 39.9 ka mga oras kada semana, mas ubos kumpara sa average nga oras nga gitrabaho sa usa ka semana niadtong Abril 2024 nga 40.5 ka oras, ug sa Enero 2025 nga 40.4 ka oras.
Tungod niini, 14.6 porsiyento, o 7.09 ka milyon, sa 48.67 ka milyon nga empleyado ang nagpahayag og tinguha niadtong Abril 2025 nga magtrabaho og dugang oras sa ilang kasamtangang trabaho, mokuha og dugang trabaho, o mangita og bag-ong trabaho nga adunay mas taas nga oras sa pagtrabaho.
Ang top five sub-sectors sa termino sa tinuig nga pagtaas sa gidaghanon sa mga empleyado niadtong Abril 2025 mao ang administrative ug support service activities; public administration ug defense; compulsory social security; agrikultura ug forestry; konstruksyon; ug edukasyon.
Sa usa ka pahayag, ang Department of Economy, Planning, and Development (DEPDev) nagkanayon nga bisan pa sa gamay nga pagsaka sa unemployment rate, ang labor market sa Pilipinas padayon nga nagpakita og kalig-on taliwala sa global headwinds tungod kay nagpabilin kini sulod sa target nga unemployment range nga 4.4 ngadto sa 4.7 porsyento.
“Also, we are optimistic about further improving our labor force in the months and years ahead, especially with the rollout of the Trabaho Para sa Bayan (TPB) Plan and the influx of new investments,” asoy ni DEPDev Undersecretary for Policy and Planning Rosemarie G. Edillon.
Matod ni Edillon nga gikinahanglan ang paghatag og prayoridad ug pagpasiugda sa usa ka nasudnong polisiya alang sa lifelong learning aron maseguro nga ang mga trabahante magpabilin nga abtik. / TPM / SunStar Philippines