Gi-salvage kadtong ulitawo nga gi-pick up niadtong Dominggo, Pebrero 18, 2024 sa tulo ka wa pa mailhing lalaki nga sakay sa puti nga van nga way plate number.
Patay nang napalgan si Bret Owen Amolo, 29, ulitawo, taga-Barangay Taloot, Lungsod sa Argao sa Martes, alas 8:20 sa buntag, Pebrero 20, 2024 nga gilabay sa bakilid nga bahin sa highway sa Sityo Kabantoy, Barangay Sumaguan, Argao.
Sa paghiling sa lawas sa biktima, gibaatan og duct tape ang tibuok nga bahin sa iyang ulo, gibinaklid og gapos ang iyang mga kamot gamit sa duct tape.
Nasuta nga adunay usa ka samad pinusilan sa iyang ulo ug laing upat ka mga pinusilan sa lawas.
NAPALGAN
Sumala pa ni Police Senior Master Sargeant Benjie Garcia nga napalgan ang lawas ni Amolo sa usa ka manuroy og isda nga sakay sa iyang motorsiklo.
Gihulagway ang dapit nga awaaw ug layo sa kabalayan.
Nihunong sa maong dapit ang mamaligyaay og isda aron unta sa pagtubag sa sugo sa lawas sa kalibunan.
Mao nalay iyang nakita ang lawas sa tawo nga nagkadugo, naka-blindfolded ug gigapos gamit ang duct tape.
Dali nga nakapahibawo ang maong tawo ngadto sa barangay officials nga mao nay mi-report sa Argao Police Station.
Ang biktima positibo nga giila sa iyang inahan nga si Enrica Amolo, kinsa nisaysay sa mga imbestigador nga gi-pick up ang iyang anak sa tulo ka mga lalaki nga nagtaptap sa ilang mga nawong sa ilang balay niadtong Dominggo sa alas 2 sa hapon.
GIDAGIT
“Naglingkod iyang anak kalit mihunong ang sakyanan tungod sa ilang panimalay. Gitawag sa tulo ka lalaki, nag-estorya, giagbayan, gipasakay sa van,” matod pa ni Garcia sigun sa asoy ni Ginang Amolo kaniya.
Si Enrica sa interbyo sa Superbalita Cebu niingon nga siya nagtuo nga okay ra ang hitabo.
Apan gibati na sila og kabalaka dihang nianang Dominggo sa gabii, wa mahiuli si Bret Owen.
Iya ning gipa-blotter sa Argao Police Station sa paglapas og 24 oras sukad sa pagkawala. Usa sa mga igsuon sa biktima ni-post pa sa Facebook nga ilang gipangita ang biktima dungan sa panghinaut nga wa untay dautan nga nahitabo niini.
Atol niining pagsuwat, wa pa matino kon unsay motibo sa pagdagit ug pagpatay kang Brent, diin sa pakisusi sa kapulisan wa kiniy record sa barangay ug dili sab badlungon.
Si Enrica nihulagway sa iyang anak nga hilumon, niingon nga wa siyay kasayuran kon nalambigit ba sa ilegal nga binuhatan si Brent, kinsa iyang gihulagway nga way kontra.
Tanang mga anggulo ang gisubay karon sa kapulisan sa pag-istablisar sa motibo sa pagpatay. (Dugang taho ni GPL)