Patay ang 24 anyos nga lalaki human gidunggab sa Sityo Nangka, Barangay Barrio Luz, Dakbayan sa Sugbo alas 11:00 sa gabii, Lunes, Enero 20, 2025.
Ang biktima giila nga si Ian Vanlor Lumapas, 24, residente ra usab sa maong lugar.
Dali nga gidala ang biktima sa Perpetual Soccour Hospital apan gideklarar nga dead on arrival.
Nanawag ang asawa sa biktima sa Mabolo Police Station aron sa pagpahibawo sa nahitabo sa iyang bana ug wala silay masayod og si kinsa ang nipatay.
Sa gihimong imbestigasyon sa Mabolo Police ug pagsusi sa mga CCTV camera, nakita nga mga higala ra sab sa biktima ang nihimo sa krimen nga sila si; Stephen Felizarta, alyas Bilon, taga San Vicente, Barrio Luz ug Allen Edward Felices alyas Bantoy.
Matod ni Police Major Romeo Caacoy. Hepe sa Mabolo Police Station nga ang duha ka suspek pulos na nabilanggo sa kaso sa ilegal nga drugas.
Sigon sa mga silingan sa biktima nga drugas ang usa sa hinungdan nganong gidunggab ang biktima.
Migawas sa gihimong imbestigasyon sa kapulisan nga gipasanginlan sa duha ka suspek nga ang biktima nga asset sa polis nga maoy nagpadakop nila.
Sa wala pa ang pagpanunggab nag-inom pa ang biktima ug ang duha ka suspek ug sa dihang nahuman na sila sa ilang inom alas 11:00 sa gabii nisulod ang biktima sa usa ka computeran.
Pipila kagutlo ang milabay miapas ang duha sa maong lugar ug nanugo og bata nga pagawson si Lumapas.
Sa paggawas sa biktima kalit lang kini nga gidunggab sa nagkadaiyang bahin sa iyang lawas, dayon sibat.
“Kining duha pulos na ni sila gikan sa sulod kay pulos na-involve sa illegal drugs, nag-inom pa ni sila pero nag-away basi sa report kay kining duha nasuko ni kay ilang gipasanginlan nga asset sa kapulisan,” matod ni Police Major Caacoy.
Nadakpan na kaniadto si Lumapas sa kaso sa illegal gambling ug gikatahong tiggamitan sab og ilegal nga drugas.
Nagpadayon ang manhunt sa kapulisan batok sa duha ka suspek. / AYB