Usa ka babaye nga bag-uhay pang nakagawas sa bilanggoan ang gidudahan nga police asset ang gipusil sa 7:32 sa gabii, Sabado, Hulyo 12, 2025 sa Sityo Magpalacir, Barangay Hipodromo, Dakbayan sa Sugbo.
Base sa pasiunang imbestigasyon sa Mabolo Police Station sigun sa giluwatang pamahayag sa kapuyo sa biktima nga mibisita sila sa ilang higala sa maong dapit.
Ilang nahimamat ang suspek sa area nga giila nga usa ka Miller Buot Monguez, ex-convict sa kasong illegal drugs, nga nagpuyo sa Brgy. Hipodromo.
Gikonprontasi ni Monguez ang biktima ug ang iyang kapuyo nga gipasanginlan nga mga police asset. Sa ilang panaglalis nibunot og .45 caliber nga armas si Monguez dayon pusil sa luyo nga bahin sa maong babaye.
Atol niining pagsuwat anaa pa sa tambalanan ang biktima nga nagpaalim sa iyang samad pinusilan samtang nagpadayon ang manhunt batok sa gitumbok nga suspek. / AYB