Managhigala nga nag-inom ug nagkalalis dihang nangahubog hinungdan nga nisangko sa pagpanunggab sa waiting shed sa national highway sa Brgy. Baliwagan, lungsod sa sa Balamban, alas 8:50 sa gabii, Agusto 22, 2024.
Ang biktima giila sa kapulisan sa ngan nga 'Roberto', 37, ulitawo samtang ang suspek mao si 'Jonneper', 20, ulitawo, pulos taga Highway, Brgy. Baliwagan, Balamban.
Basi sa imbestigasyon sa kapulisan sa Balamban ubos sa kamandoan sa ilang hepe nga si P/Maj. Julius Garcia nga ang biktima ug ang suspek nag-inom sa waiting shed.
Matod pa, ang biktima nisugo sa uyoan sa suspek ug kay wa kini tahura, gitukmod sa biktima nga niresulta sa ilang panaglalis ug ang suspek nidunggab sa biktima gamit ang hunting knife. Naigo si Roberto sa iyang walang bahin sa lawas nga gidali sa pagtabang ug gidala sa tambalanan, samtang ang suspek nadakpan sa hot pursuit sa kapulisan ug gibalhog sa bilanggoan sa lungsod samtang nagpaabot sa kasong ipasaka. / DVG