Naibtan sa tunok ang mga silingan ni Noeh Balatario, 39, taga-Sityo Capaculan, Barangay Tisa, Dakbayan sa Sugbo sa dihang gisikop sa mga sakop sa Labangon Police Station.
Si Balatario nga gihulagway nga ‘basagulero’ o siga sa ilang dapit nadakpan niadtong Huwebes sa alas 10 sa gabii, Agusto 1, 2024.
Nakuhaan ang suspek og armas nga adunay duha ka mga bala, human nga mirespondi ang Labangon Police Station nga gipangulohan sa ilang hepe nga si Police Major Eraño Regidor.
Naatlan pa sa mga polis nga nagbitbit sa armas si Balatario. Sumala sa suspek nga dili iya ang maong armas ug iya lang kining gibayloan og duha ka pakete nga shabu.
Gibutyag ni Regidor nga nangreklamo ang mga silingan batok ni Balatario kay kon mahubog, magmaoy kini ug magdala-dala og armas.
Giila sab siya nga usa ka drug personality sa lugar. / AYB