Palawman pa sa kapulisan sa Siyudad sa Sugbo ang ilang imbistigasyon aron matultohan ug mapasakaan usab og kaso ang mastermind sa pagpusil-patay kang Leo Leaño sa Barangay Sudlon 1 niadtong Septiyembre 3, 2026, human gipang-docket na ang reklamo batok sa tulo sa upat ka mga suspek.
Gipadayag ni Police Lieutenant Colonel Gerard Ace Pelare, deputy city director for operations sa Cebu City Police Office (CCPO), nga aduna na silay gipagawas nga lig-on nga lead kon kinsa ang nagpaluyo ug nagsugo nga ipapatay ang biktima.
Pasabot ni Pelare nga wala nila gidali-dali ang paglakip sa mastermind sa unang gipasaka nga kaso tungod kay gusto nilang masiguro nga "airtight" ug walay buslot ang ebidensya batok niini.
"We just need to thoroughly conduct case build up kay aron dili ma dali-dali unya sigurado ta nga ang atong i-file is airtight nga kaso," matod ni Pelare.
Nipirma na sa mga dokumento ang pamilya sa biktima lakip ang iyang asawa ug mga anak alang sa pormal nga pagkiha sa mga suspek.
Nagtunol usab sila og mga mahinungdanong impormasyon nga nakatabang sa gihimong case build-up sa kapulisan.
Lalis sa yuta ang pabilin nga gidudahang motibo sa maong pagpatay, subay sa unang pamahayag sa nadakpang gunman nga si John Elvis Catantan Gutobat nga gikompirmar usab sa pamilya sa biktima.
Gibutyag usab ni Pelare nga ang upat ka mga suspek nga silang Ritchie Batican Calunsag ; giilang lider, Eleazar Angustia Nace ; ang drayber, Gutobat; ang gunman, ug si alyas "Shaun" nga at-large pa, mga notadong gun-for-hire ug dili na bag-o sa maong klase sa pagpatay.
Nagpadayon ang manhunt operation ug pag-monitor sa CCPO batok sa nagpabilin pang gawasnon nga si alyas Shaun. / AYB
