Patay na nga napalgan ang 63- anyos nga lalaki sa luyo sa ilang balay sa Purok Makugihon, Barangay Punta sa lungsod sa San Remigio probinsya sa Sugbo alas 7:45 sa buntag, Dominggo, Agusto 17, 2025.
Ang bitkima giila nga si Severino Ancao Canama Jr., 63 anyos.
Nakadawat og tawag sa telepono ang San Remigio Municipal Police Station alas 8:30 sa buntag nga nagpahibawo nga dunay patay’ng lawas nga napalgan og gituohan nga gidunggab.
Dali nga miresponde ang mga pulis ug gipahiling dayon nila kini sa municipal doctor nga si Dr. Orleta Ursal.
Sa paghiling sa lawas sa biktima, wala kiniy samad gawas sa mga pangos sa tiil nga gituohan nga nadagma kini.
Base sa pamahayag sa igsuon sa biktima nga si Nestor Canama ug ig-agaw niini nga si Ronier Piodema, sila mibutyag nga aksidente ra ang nahitabo kang Severino.
Katapusan nga nakit-an ang biktima niadtong Sabado sa gabii, Agusto 16, 2025, nga hubog tungod kay piyesta sa ilang barangay ug daku ang posibilidad nga tungod sa kahubog nadagma kini ug nakuyapan nga maoy hinungdan sa iyang kamatayon.
Giawhag sa San Remigio Police Station ang kabanay nga ipaubos sa autopsy ang patayng lawas ni Severino apan nagdumili sila sanglit nagtuo sila nga walay foul play ang kamatayon niini. / AYB