Ho Chi Minh City, Vietnam – Usa sa mga labing sikat ug makasaysayanon nga destinasyon sa Vietnam mao ang Cu Chi Tunnels, usa ka halapad ug lawom nga tunnel system nga nagsilbing puy-anan ug depensang linya sa mga Viet Cong atol sa Gubat sa Vietnam.
Gikan sa Lungsod sa Cu Chi, mga 40 kilometros gikan sa sentro sa Ho Chi Minh City, ang sistema sa tunnel gitukod pa sa late 1940s, panahon sa giyerang kontra sa mga French. Sa pagkahuman sa gubat, gipadako kini ug gigamit pag-ayo sa panahon sa pagsukol sa mga kumonistant Vietnamese sa mga Amerikano.
Sobra sa 250 kilometros ang gitas-on niini ug adunay tulo ka lebel nga mosangko sa 10 metros ang kalawom. Gidisenyo kini aron malikayan ang pagbomba, pagsulod sa kaaway, ug bisan ang poison gas. Gamit kini isip command center, ospital, kusina, ug puluy-anan sa mga sundalo. Gamit kaayo kini sa mga kalit-kalit nga atake ug dali nga pagtago balik ilawom sa yuta.
Sa pagkakaron, ang mga turista makasulod sa piniling mga bahin sa tunnel nga gihimo nang mas lapad ug taas gamay alang sa kaluwasan sa mga mosulod. Apan bisan pa, makasinati gihapon ang nga turista sa kakusog ug kalisod nga gibati sa mga Viet Cong kaniadto.
Makita sa palibot ang mga traps, camouflaged entrances, mga buho nga molagbas ngadto sa laing bahin sa kalasangan, ug mga display sa ilang armas ug kagamitan. Aduna sab silay shooting range ug kapehan sa daplin sa tour areas.
Dugang pa, matilawan sab ang pagkaon sama sa nilung-ag nga kamoteng kahoy ug itunol nga may tsaa, nga mao ra'y nakaon sa kasagaran sa mga sundalong kumonista.
Ang Cu Chi Tunnel usa ka buhing pamatuod sa kusog, kaalam, ug pagpaningkamot sa mga Vietnamese — ug usa ka importante nga atraksyon alang sa mga hilig sa kasaysayan ug adventure. /