Pormal na nga niduso og reklamo ang Anti-Cybercrime Group 7 sa buhatan sa Cebu City Prosecutors Office batok sa mga tagdumala sa BMJ Data Processing Services nga nahimutang sa Gallery sa Barangay Kasambagan sa Dakbayan sa Sugbo.
Niadtong Mayo 27, 2025 gi-serve sa ACG ang warrant to seize and examine computer data sa mga computers ug laptop nga gigamit sa scam hub nga giluwatan ni Judge James Stewart Ramon E. Himalaloan sa RTC Branch 7 sa dakbayan.
Kini subay sa kalapasan sa Section 11 sa Republic Act 11765 o Financial Products and Services Consumer Protection Act in relation sa Section 6 sa RA 10175.
Una na nga gibulgar sa usa ka youtuber nga langyaw nga ni-hack sa system sa maong kompanya lakip na sa ilang CCTV, ang ilang ilegal nga operation nga mao ang pagpangilad sa ilang mga customer sa gawas sa nasod.
Human mabulgar ang pagpangilad ug natultolan ang ilang opisina sa usa sa lawak sa building sa Gallery sa Barangay Kasambagan nilusad dayon og operation ang PNP.
Nakuha nila ang 43 ka mga computer sets, laptop ug ubang mga gamit aron ipaubos sa eksaminasyon ug mokuha og data nga mahimong gamiton nga ebidensya sa pagpasaka og kaso.
Subay niini ang Legal Attache sa Federal Bureau of Investigation sa America ang ni-courtesy call kang Police Brigadier General Redrico Maranan , hepe sa kapulisan sa Police Regional Office (PRO) 7 niadtong Huwebes, Mayo 29, 2025. / AYB