Sagubangon sa Gilas Pilipinas ang makonsiderar nga labing lisod niining tahas sa Fiba Asia Cup karong Miyerkules sa alas 7:00 sa gabii, Agusto 13, 2025 (PH time) sa Jeddah, Saudi Arabia.
Gitumbok mao ang pagpakigbatok sa Gilas sa two-time defending champion Australia Boomers sa quarter-finals.
Ang Boomers wala pa nakatilaw og pilde sukad nga giusa sa Fiba ang Asia ug Oceana teams ning maong torneyo niadtong 2017. Alang ni Cone, usa ka tanghaga kining sangkaa lang kaniya kay wala pa siya nakagiya sa Gilas batok sa Boomers.
“I never coached against Australia before. This will be my first time and I’m excited about it,” asoy ni Cone nga napatik sa Spin.ph.
“We know they are pretty much the No. 1 seeded team in the tournament and for us to beat them it’s going to be an upset.”
Ning sangkaa, nanghinaot si Cone nga makakuha sila og dugang kadasig gikan sa ilang overtime nga kadaugan batok sa host Saudi Arabia, 95-88, sa usa ka knockout game kagahapon sa kadlawon. / ESL