Nag-atubang og do-or-die game ang Gilas Pilipinas kontra host nation Saudi Arabia sa qualification round para quarterfinals sa 2025 FIBA Asia Cup karong Martes, Agusto 12 (PH time).
Nakakuha sa ikatulong pwesto ang Gilas sa Group D human nila napilde ang Iraq, 66-57, niadtong Sabado sa Jeddah, Saudi Arabia.
Pagka-kompleto sa tanang duwa sa Group D, nakaposisyon sa unang puwesto ang New Zealand (3-0), gisundan sa Chinese Taipei (2-1), Gilas (1-2) ug ang Iraq nga na-eliminate na sa kompetisyon.
Ang Gilas ug Saudi Arabia magtigi alas 12 sa kadlawon sa oras sa Pilipinas, kini para sa luna na sa quarterfinals ug higayon nga makontra ang top-seed sa Group A.
Ang Saudi, kinsa gipilde sa Gilas sa 2022 FIBA World Cup qualification, dunay bag-ong reinforcement karong tuiga nga sila hotshot Muhammad-Ali Abdur-Rahkman ug sentro nga si Mohammed Alsuwailem.
Si Abdur-Rahkman, nga mao ang naturalized player sa Falcons, nag-una sa team scoring nga dunay 23.7 puntos (ikatulo sa tibuok torneyo), 5.7 rebounds ug 4.0 assists.
Sa wa pa ang duha ka players gipilde sa Gilas ang Saudi og duha ka sunodsunod, sa Mall of Asia Arena (84-46) ug sa Jeddah (76-63).
Bisan pa naghupot og advantage ang Gilas sa previous games, di pa masukod karong tungora tungod sa bag-ong players sa Saudi ug gikan pud og duha ka pilde ang Gilas kontra Chinese Taipei (95-87) ug New Zealand (94-86), sa wa pa nila makuha ang daog sa Iraq. / RSC