Kontrahon sa Gilas Pilipinas ang host Chinese Taipei sugod karong alas 7:00 Huwebes sa gabii, Pebrero 20, 2025, sa ikaupat ug katapusang tipik sa 2025 FIBA Asia Cup qualifiers sa Taipei Heping basketball gymnasium.
Ang Gilas adunay 4-0 nga rekord nga ilang narehistro sa nangaging duha ka mga tipik sa qualifiers nga nakapa-qualify nilang daan sa FIBA Asia Cup tournament proper nga gikatakda karong Agusto 5-17 sa Jeddah, Saudi Arabia.
Taliwala niini, gitataw ni Gilas coach Tim Cone nga dili sila molugak og gamay ning maong tahas.
Gipasabot ni Cone nga ang ilang mga duwa sa katapusang tipik sa qualifiers nahilakip sa ilang preparasyon alang sa tournament proper.
Ang Chinese Taipei, nga adunay 1-3 nga rekord, nagkinahanglang modaog ning sangkaa aron magpabiling buhi ang ilang paglaum alang sa tournament proper.
Human ning maong duwa, ang Gilas molarga paingon sa Auckland, New Zealand aron kontrahon ang host squad New Zealand Tall Blacks karong Pebrero 23.
Ang Tall Blacks, nga adunay 3-1 nga rekord, naka-qualify na sab daan alang tournament proper.
Ang Gilas bag-uhay pa lang ningkombati sa Doha Invitational sa Qatar diin ninghamag kini og tulo ka mga duwa sulod sa lima ka mga adlaw.
“Tough schedule, but that’s just the way it is this window,” matod sa usa sa mga pambato sa Gilas nga si Dwight Ramos nga napatik sa www.pba.ph. / ESL