Gilas moduwa batok sa Poland

Gilas moduwa batok sa Poland
PAMBATO: Ang mga miyembro sa Gilas Pilipinas nga sila si Kai Sotto (wala) ug Dwight Ramos (tunga) nalakip sa mga saligan sa team sa umaabot nga FIBA Olympic Qualifying Tournament. / Hulagway sa Internet

Kontrahon sa Gilas Pilipinas ang kampo sa Poland nga gibidahan og National Basketball Association (NBA) player karong adlawa, Hunyo 30, 2024 (PH time), sa Valencia, Spain, alang sa final friendly match sa di pa ang FIBA Olympic Qualifying Tournament.

Ang mohagit sa kampo sa Gilas mao si Jeremy Sochan nga gaduwa sa San Antonio Spurs sa NBA. Si Sochan mohimo sa iyang debut sa Poland sa ilang FIBA OQT game.

Nakaduwa na si Sochan sa Poland sa ilang preparasyon nga duwa kontra New Zealand, 88-59, pila ka adlaw ang milabay, diin mimarka siya og pito ka puntos, duha ka rebounds, upat ka assists sa 8 minutos nga playing time.

Lain pud nga bantayan sa mga Pinoy mao si Mateusz Pontika, kinsa nagduwa sa Partizan Belgrade sa Serbia league. Siya ang nagdala sa Poland ngadto sa ilang unang semifinal appearance sulod sa 51 ka mga tuig sa FIBA Eurobasket 2022, diin miposte siya og 26 puntos, 16 ka rebounds ug 10 ka assists.

Miiskor pud siya og 29 puntos kontra New Zealand.

Ang Gilas mipakita og nindot nga labok sa ilang tune-up game kontra Turkey, apan napildi gihapon sila sa iskor nga 84-73.

Ang sangka kontra Poland mao ang uwahing duwa sa Gilas sa dili pa sila mobiyahe padulong sa Riga, Latvia alang sa FIBA OQT nga duwaon sugod sa Hulyo 2 ngadto 7.

Lakip sa Gilas Pilipinas lineup mao sila Mason Amos, Chris Newsome, Calvin Oftana, CJ Perez, Dwight Ramos, Justin Brownlee, Carl Tamayo, Kai Sotto, June Mar Fajardo, Japeth Aguilar, ug Kevin Quiambao.

Gipangulohan ang team ni PBA most-winningest coach Tim Cone.

Ang FIBA OQT mao ang final nga tsansa para makakuha ang nasod og luna sa Paris Olympics. / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph