Tungason kaayo nga dalan ang pagatahakon sa Gilas Pilipinas sa ilang kampanya sa umaabot nga Asia-Oceania qualifiers alang sa 2027 FIBA World Cup.
Kini human nahiluna ang Gilas sa Group A kauban ang powerhouse teams Australian Boomers ug New Zealand Tall Blacks atol sa official drawing of lots sa Al Hazm sa Doha, Qatar ning Miyerkules, Mayo 14, 2025 (PH time).
Ang laing nahisakop sa Group A mao ang Guam, diin miyembro ang pambatong guard sa San Miguel Beermen nga si Jericho Cruz.
Ang Australia maoy kasamtangang FIBA world ranked No. 7, No. 22 ang New Zealand, No. 34 ang Gilas samtang No. 88 ang Guam.
Si National men’s team deputy coach Sean Chambers maoy nagrepresentar sa Pilipinas sa draw proceedings nga gidumala ni FIBA Global Ambassador ug retired NBA superstar Carmelo Anthony.
Nahisakop sa Group B mao ang Japan, China, South Korea, ug Chinese Taipei, ang naa sa Group C mao ang Iran, Jordan, Syria, ug Iraq samtang naa sa Group D mao ang Lebanon, Saudi Arabia, India, ug host Qatar.
Ang mopatigbabaw nga tulo sa matag grupo mao ang makaabante sa 2nd round diin magparang ang teams sa Group A batok Group C ug Group B batok Group D.
Ang Asia-Oceania qualifiers ipahigayon sa ulahing bahin sa Nobiyembre, 2025, sa Doha, Qatar. / ESL