Ang Gilas Pilipinas Women star nga si Jack Animam mipahigayon sa iyang unang libreng youth basketball camp sa iyang hometown sa Malolos, Bulacan niadtong Sabado.
Gipundok ni Animam ang mga batang lalaki ug babaye nga nag-edad 13 hangtod 17 anyos para sa usa ka adlaw nga training sa basketball basics ug advanced fundamentals nga gipahigayon sa Malolos Sports and Convention Center.
Bisan pa sa dili maayo nga panahon, kapin sa 20 ka kabatan-onan ang mitambong ug nakatilaw og leksyon gikan mismo sa usa sa mga pinakamaayong basketbolista sa nasud.
Tungod kay libre ang camp, mapasalamaton si Animam sa mga brand nga mitabang og sponsor sa event. Tungod niini, nakauli ang mga bata nga dala ang kompletong pakete nga adunay t-shirt, bola, trophies, ug medals.
Ang maong kalihukan usa ka paagi ni Animam aron mupalapad sa iyang mensahe nga ang edukasyon ug sports pwede magsabay ug usa ka inspirasyon para sa kabatan-onan nga maningkamot sa ilang damgo — sa court ug sa kinabuhi. / RSC