Gidugang sila si Rhenz Abando, Zavier Lucero, RJ Abarrientos, ug Troy Rosario sa Gilas Pilipinas pool alang sa FIBA Asia Cup 2025 nga ipahigayon sa sunod buwan sa Jeddah, Saudi Arabia.
Nagkanayon si Gilas coach Tim Cone nga ilaha kining gihimo aron pagtuman sa lagda sa torneyo nga mosumiter og "taas og lista” nga lineup.
Sila si Abarrientos ug Rosario ning-apil na sa praktis sa Gilas niadtong Lunes, Hulyo 7 samtang si Lucero kasamtangan pang nagbakasyon sa US.
Sa iyang bahin, si Abando mopakita pa og aksyon sa kampanya sa Strong Group Athletics sa Jones Cup.
Gipasabot ni Cone nga ang nangahisgutan apil sab sa posibleng mapili alang sa Final 12.
Ang 12 ka mga magduduwa nga inisyal nga gipili ni Cone alang sa Gilas pool mao sila si Justin Brownlee, Kai Sotto, June Mar Fajardo, Scottie Thompson, Chris Newsome, Carl Tamayo, Kevin Quiambao, Dwight Ramos, Kevin Quiambao, Cjay Perez, Calvin Oftana, ug Jamie Malonzo.
Si Japeth Aguilar gipili ni Cone isip puli ni Sotto, kinsa padayon pang nagpaalim sa iyang ACL injury.
“They required us to put a long list together for the Asia Cup. So I think we put 15, 16 players. Kai’s on that list too, but obviously he’s not playing,” pasabot ni Cone. / ESL