Nakakuha og luna ang Gilas Pilipinas women’s 3x3 team sa knockout stage sa FIBA Asia Cup ug makigharong kini sa Chinese Taipei sa Dominggo, Marso 31, 2024, sa Singapore Sports Hub.
Ang Gilas Pilipinas maoy mi-top sa Pool C tungod sa ilang 2-0 nga rekord.
Gipilde sa Pinay players ang Mongolia, 19-8, gisundan kini og impresibo nga daog kontra No. 6 Malaysia, 17-10.
Ang Pilipinas misulod sa torneyo nga seeded No. 11 sulod sa 20 ka mga nasod.
Ang Chinese Taipei nipilde sa Singapore, 18-8, aron kuhaon ang second seed sa Pool A.
Top seed sa Pool A mao ang powerhouse China nga nipilde sa Chinese Taipei (11-9) ug Singapore (20-12). Ang Mongolia (1-1) maoy nikuha sa No. 2 spot sa Pool C ug mokontra sa China sa quarterfinals. / RSC