Buhi pa ang paglaum sa Gilas Pilipinas Youth sa FIBA U16 Asia Cup sa MBank Arena sa Mongolia.
Kini human gipangbuntog sa Chinese Taipei ang Indonesia, 107-102, atol sa katapusang duwa sa Group B niadtong Martes, Septiyembre 2, 2025.
Ang naghari sa Group B human sa group stage mao ang New Zealand, nga adunay 3-0 nga rekord, ikaduha ang Chinese Taipei (2-1), ikatulo ang Gilas Youth (1-2), ug ikaupat ang Indonesia (0-3).
Niini, ang New Zealand nakaderetso sa quarter-finals samtang makigsangka og teams gikan sa Group A ang Chinese Taipei ug Gilas Youth sa qualification to quarter-finals stage.
Ang Indonesia nanamilit na sa torneyo.
Sa qualification to quarter-finals, kontrahon sa Gilas Youth ang No. 2 team sa Group A nga mao ang Bahrain. / ESL