Nagbangis ang Gilas Pilipinas Youth og ang biktima niini mao ang Thailand nga gilubong og 45 puntos, 87-42, sa FIBA U16 Asia Cup SEABA Qualifiers sa Bren Z. Guiao Convention Center, San Fernando Pampanga, niadtong Dominggo, Mayo 25, 2025.
Nisaka ang Gilas Youth ngadto sa 2-0 (win-loss) record human nila sugdi ang torneyo og, 116-62, nga kadaugan batok sa Vietnam niadtong Sabado.
Si Gab Delos Reyes, ang Finals MVP sa UAAP Season 87, nipabuto og 16 puntos ug siyam ka rebounds alang sa Gilas Youth kinsa usa sa duha ka teams nga nagpabiling wa’y pilde sa torneyo. Nidugang si Andwele Cabañero og 10 puntos sulod sa 14 minutos nga playing time, samtang si Prince Cariño nihatag og 11 puntos ug pito ka rebounds.
Padayon ang misyon sa Gilas Youth sa pagdominar sa rehiyon ug seguruhon ang tiket padulong sa FIBA U16 Asia Cup main tournament.
Si Gilas Youth coach LA Tenorio niingon nga bisan dagko ilang labaw sa mga duwa, dili angay mokumpiyansa. / RSC