Usa ka 18 anyos nga tinun-an gitabangan og lugos sa hilit nga dapit sa Sitio Canjuntic, Barangay Calongcalong, dakbayan sa Toledo, alas 11:57 sa gabii, Biyernes, Agusto 23, 2024.
Ang biktima nga si Lyda (di tinuod ngan), tinun-an sa Grade 10, ug molupyo sa maong dapit.
Ang mga suspek mao si 'Alan', 21, taga Sitio Canjuntic, Brgy. Matab-ang, Toledo, ug ang iyang silingan nga si 'Gary', 35, mekaniko. Wala gibutyag ang ilang tinuod nga ngalan subay sa polisiya sa kapulisan.
Ang mga suspek nadakpan alas 2:50 sa kaadlawon sa Sabado, Agusto 24, 2024, sa Brgy. Calongcalong.
Si Police Chief Master Sgt. Joy Enerio, hepe sa Women's and Children Protection Desk (WCPD) sa Toledo Police Station nga nahinabi sa Superbalita Cebu, nagkanayon nga positibong gitudlo sa biktima ang mga suspek.
Matod pa, dunay disko nga kalingawan subay sa tinuig nga kapistahan sa barangay.
Ang kapulisan nga sakop sa Bisdak Cop Riders, nagbantay sa seguridad atol sa disko sa kapistahan.
Usa ka concerned citizen ang niduol sa mga polis alas 2:50 sa kaadlawon Sabado, Agusto 24, 2024, nga napahibalo nga dunay nahitabong pagpanglugos nianang sayo sa gabii. Nirespondi ang mga polis uban sa kabanay sa biktima.
Gibutyag sa biktima nga nagtagay sila uban sa iyang mga higala ug tungod sa kahubog, sila nakaadlawonan hinungan nga nakahukom nga mamauli na.
Si Alan niduol kanila bulontaryo nitanyag sa biktima nga siya na lang mohatad sa ilang panimalay ug gipasakay ang biktima sa motorsiklo.
Nagsunod sab nila nga nagmotorsiklo ang ikaduhang suspek nga mekaniko apan pag-abot sa awa-aw nga dapit, gipahimuslan sa mga suspek ang biktima.
Tungod kay nakainom, walay naghimo ang biktima sa pagsukol sa mga suspek ug nakuha ang pagkababaye niini.
Si Enerio niingon nga giandam na niya ang mga dukomento alang sa pagpasakag kaso batok sa mga suspek. / GPL