Giluya sa gika-sex, gikawata’g selpon

Nagpatabang sa Parian Police Station sa Cebu City Police Office (CCPO) ang 25 anyos nga bayot nga call center agent nga mo take og board exam sa Civil Engineering human gipulihan ang iyang Iphone og laing cellphone sa lalaki nga iyang gikatagay sa lawasnong kalipay sa sulod sa usa ka inn nga nahimutang sa Dan Sikatuna, Dakbayan sa Sugbo.

Matod sa biktima nga si alyas France, sila ningsulod sa inn alas 11 sa gabii sa Huwebes, Abril 18, apan sa iyang pagmata sa alas 4 sa kaadlawon sa Biyernes, natingala siya nga nalahi na ang iyang cellphone.

Giangkon ni France nga iyang gikaila ang mao nga lalaki sa usa ka 24/7 convenience store sa dalan Junquera ug nag-inom una sila og Kulafu.

Human nahurot ang duha ka botelya, sila nagkasinabot nga manulod og inn aron magtagay sa lawasnong kalipay.

Gani ang mao nga lalaki maoy nibayad sa kwarto.

Apan human sa ilang kumbati, siya naluya ug nakatulog ug sa iyang pagmata, wala na ang lalaki ug nailisdan na usab ang iyang mahalon nga cellphone.

Lakip sa nawagtang ang iyang pitaka nga dunay sulod nga kwarta ug importante nga mga dokumento sama sa identification (ID) card.

Gihulagway ni France ang kawatan nga pution og, pamanit naa na sa 30 ang pangidaron ug nipis ang buhok nga dunay gitas-on nga 5’4-5’5 foot.

Iyang gitug-an nga sigun sa mga trabahante sa inn nga kanunay na mo check in ang maong lalaki nga dunay laing kauban nga lalaki usab.

“Maoy giingon sa nagbantay didto nga i-report lang daw nako sa polis kay murag ma trace ra na siya somewhere kay murag regular costumer siya didto,” matod ni France.

Siya nibalik sa inn aron makatan-aw sa CCTV apan gibalibaran siya sanglit wala pa naabot ang management.

Hinuon siya gipasaligan nga mohatag ang inn kon naa na ang technician.

Nanawagan siya sa iyang nakatagay sa lawasnong kalipay nga iuli lang ang iyang Iphone tungod kay naa didto ang contact numbers nga mahinungdanon kaayo.

Usa sa mga imbestigador sa Parian police station nagkanayon nga ila pa nga adtuon ang inn aron matan-aw ang CCTV camera sa establisemento ug mailhan ang kawatan.