Magtigi ang sister teams San Miguel Beermen ug Barangay Ginebra Gin Kings sa Philippine Basketball Association (PBA) Commissioner’s Cup semifinals human nila gipalukapa ang managlahi nga kontra sa quarterfinals.
Gipatapsingan sa Beermen ang Rain or Shine Elasto Painters, 127-122, samtang gilubong sa defending champion Gin Kings ang NorthPort Batang Pier, 106-93, sa PhilSports Arena sa Biyernes sa gabii, Enero 19, 2024.
Magpasikatay ang Gin Kings ug Beermen sa best-of-five semifinals. Sugdan ang semis inig ka kompleto sa uwahi’ng luna nga ilugan sa Meralco Bolts batok sa Phoenix Super LPG Fuel Masters karong Dominggo sa gabii sa MOA Arena.
Ang modaug sa do-or-die game kontrahon sa Magnolia Chicken Timplados Hotshots sa semis.
Sa social media adunay mga nasagmuyo sa nahitabo sa PBA.
Matod pa sa usa ka nga netizen nga tulo ka sister teams Ginebra, San Miguel ug Magnolia ang nasulod sa semis nga maoy nagpakita nga di na balansi ang liga.
Sa laing habig, gidepensahan pud sa netizen ang San Miguel Corporation (SMC) teams, matod niini nga miduwa og patas ang maong teams ug walay angay nga sawayon sa ilang pagpangharos sa quarterfinals.