Paamagon og suway sa Brgy. Ginebra Gin Kings ang ilang poruhan alang sa inilugay og luna sa Top 4 sa ilang pagpakigbatok sa NLEX Road Warriors sugod karong alas 6:30 sa gabii, Enero 13, 2024, sa usa ka out-of-town game sa Philippine Basketball Association (PBA) Season 48 Commissioner’s Cup sa Legazpi City, Albay.
Mahinungdanon ang pagsulod sa Top 4 gumikan kay nagtangag kini og twice-to-beat nga benepisyo alang sa nagkaduol nga quarter-finals.
Ang Gin Kings, nga mosagubang sa katapusan nilang tahas sa elimination round, naggunit og 7-3 nga rekord diin kasamtangan pa silang sulod sa Top 4.
Apan kon mapilde ang Gin Kings ning duwaa, mohanap ang ilang paglaum sa Top 4.
Sa ilang bahin, ang Road Warriors nagbitay sa ikasiyam nga puwesto dala ang 4-6 nga rekord.
Kinahanglang modaug ang Road Warriors ning sangkaa aron makalikay sa kaw-it sa panamilit.
Hinuon, nagdepende pa ang tanan sa resulta sa nahabiling duha la mga duwa sa elimination round.