Gin Kings mitabla sa Tropa

Gipatapsingan sa Brgy. Ginebra Gin Kings ang TNT Tropang Giga sa Game 2, 71-70, aron tablahon ang championship series, 1-1, sa Philippine Basketball Association (PBA) Season 49 Commissioner’s Cup niadtong Dominggo sa gabii, Marso 16, 2025, sa Mall of Asia Arena sa Pasay City.

Sama sa naandan, gipangulohan ang Gin Kings sa ilang resident import nga si Justin Brownlee, kinsa nagpakatap og 35 puntos ug 11 rebounds.

Nihatag og dakong suporta ni Brownlee mao si Scottie Thompson, kinsa nimugna og 16 puntos ug 12 rebounds.

Ang Gin Kings, nga nasugamak sa 89-95 nga pilde sa Game 1, nigamit og pilit nga depensa nga maoy tataw nga dakong hinungdan nga nakuha nila ang daog ning low scoring nga kombati.

“They just showed true grit all the way through the game,” matod ni Ginebra coach Tim Cone kabahin sa iyang mga sakop nga napatik sa www.pba.ph.

“We knew if we’re going to have a chance in the series, we have to show that character and that true grit.”

Adunay higayon nga nakakita og sulbad ang Tropang Giga sa depensa sa Gin Kings dihang nakamugna sila og 14-3 nga rally aron pagposte og 70-67 nga labaw sa nahabiling 2:31 minutos.

Human niini, naghinugtanay sa bakus ang duha ka mga puwersa hangtod na sa katapusang gutlo.

Ang Tropang Giga gipangulohan sa ilang import nga si Rondae Hollis-Jefferson pinaagi sa 25 puntos niini, niamot og 14 puntos si Roger Pogoy samtang nitunol og 11 puntos si Rey Nambatac.

Ang Game 3 sa best-of-seven series kombatihon ugma sa Philsports Arena sa Pasig City.