Gin Kings mosuway’g paburot sa ilang paglaum sa top two

Paamagon og suway sa Brgy. Ginebra Gin Kings ang ilang paglaum alang sa inilugay og puwesto sa Top 2 sa ilang pagpakigbatok sa nagkagidlay nga Converge FiberXers sa main game karong gabii, Abril 27, 2024, sa out-of-town game sa Philippine Basketball Association (PBA) Season 48 Philippine Cup sa Aquilino Pimentel Jr. International Convention Center sa Cagayan de Oro City.

Ang Gin Kings, nga adunay 6-3 nga rekord, nagkinahanglan nga modaug sa katapusan nilang duha ka mga tahas sa eliminasyon sugod karon aron pabukahon ang ilang dalan paingon sa Top 2.

Mahinungdanon ang pag­sulod sa Top 2 gumikan kay nagtangag kini og twice-to-beat nga benepisyo sa quarter-finals.

Sa ilang bahin, ang FiberXers nagbitay sa labing ubos nga puwesto dala ang 1-8 nga rekord ug wala nay paglaum nga makataak sa quarter-finals.

Apan wala kini nagpasabot nga us-os ang abaga sa FiberXers sa ilang pagpakigbatok sa Gin Kings.

Tinguha sa FiberXers nga manamilit nga adunay bawon nga garbo nga ilang magamit alang sa ilang pagpangandam sa sunod komperensya.

Sa premirong duwa, magsangka ang NorthPort Batang Pier ug Blackwater Bossing, nga pulos nanikaysikay nga makakumpayot pa og puwesto sa nakaduol nga quarter-finals.

Ang Bossing naggunit og 3-5 nga rekord samtang ang Batang Pier adunay 4-6 nga baraha. / ESL