Duha ka lalaki nga ilegal nga namaligya og krudo ang nadakpan sa gilusad nga buy-bust sa San Fernando Police Station alas 2:20 sa kaadlawon, Martes, Hulyo 15, 2025, sa kilid sa karsada sa Barangay South Poblacion, Lungsod sa San Fernando.
Ang mga nabalhog sa custodial facility sa San Fernando Police Station giila nga silang Aurelio Tolero Etorema, 37, ug Joseph Loyd Capta Villamero, 33, pulos taga Barangay Tinubdan, San Fernando.
Nakuha sa kapulisan ang 36 ka gallon nga dunay sulod nga 20 litros nga krudo ug ang sakyanan nga multicab nga gikargahan.
Matod ni Police Major Michael Gingoyon , hepe sa kapulisan sa San Fernando nga nakadawat sila og tawag sa telepono nga dunay namaligya og krudo sa kilid sa karsada sa South Poblacion hinungdan gi-monitor.
Human masusi nga tinuod, gilusad dayon ang buy-bust nga niresulta sa pagkasikop sa duha nga wa makapakita'g permit sa pagpamaligya gikan sa Department of Energy (DOE).
Kalapasan sa Presidential Decree 1865 ang ipasaka sa kapulisan batok sa maong mga suspek. /