LABING minos 10 ka plastic bag nga sulod ang medikal nga basura ang gipanglabay daplin sa dalan sa Barangay Libjo, Lungsod sa Tabogon niadtong Martes, Hunyo 24, 2025.
Pipila sa mga medikal nga basura sulod sa mga yellow plastic bag mao ang mga gigamit nga syringes, dialysis tubing, ug blood collection tubes.
Giingong gikan kini sa usa ka medical laboratory nga nahimutang sa Bogo City base sa findings sa mga opisyal sa Barangay Libjo ug sa Municipal Sanitary Health Office (MSHO).
Si Tabogon Mayor Francis Salimbangon, sa interbyu niadtong Miyerkules, Hunyo 25, nimando sa municipal council ug sa Philippine National Police (PNP) sa pag-imbestigar ug pagpasaka og kaso batok sa mga tawo nga responsabli sa paglabay sa medikal nga basura sa maong dapit.
“Oo, mopasaka ta og kaso. Panahon na nga striktuhon ang atong pagpatuman sa mga lagda, labi na sa hazardous waste kay dako na kaayo ni nga problema ang pagpabaya sa paglabay sa basura,” matod ni Salimbangon.
Gipasabot sa MSHO kang Salimbangon nga ang mga yellow plastic bag gigamit alang sa paglabay sa mga infectious waste.
Matod ni Salimbangon nga nailhan ang pasilidad kon diin gikan ang giingong medikal nga basura apan wala lang una ibutyag sanglit padayon pa ang imbestigasyon.
Gibutyag sa mayor nga nahipos na ang mga basura ug gamiton isip ebidensya.
Gibutyag ni Salimbangon nga gitabangan sa Municipal Health Office ug Rural Health Unit ang mga tawo nga nikolekta sa mga basura.
“Giyahan sila kon unsaon pag-handle ang mga basura aron malikayan ang bisan unsang disgrasya,” matod ni Salimbangon.
Matod sa mayor nga dili kini ang unang higayon nga gilabayan sa basura ang Tabogon.
Apan unang higayon nga nalambigit na og medikal nga mga basura.
Unang insidente nga naglambigit sa pagkadiskubre sa mga basura nga upholstery sa sakyanan nga dili sab husto ang paglabay.
Kasagaran gilabay ang mga basura sa hilit nga mga lugar.
Nakamugna og kabalaka ang gipanglabay nga medical wastes tungod kay duol ra kini sa mga eskwelahan sa lungsod.
Si Patrolman Chrisjohn Nerves sa Tabogon Municipal Police Station sa interbyu pinaagi sa tawag sa telepono kaniadtong Miyerkules, niingon nga tulo ka tawo ang gi-turnover sa ilang estasyon human nakita sa dapit dihang nahitabo ang paglabay sa medikal nga basura.
Sa usa ka blotter report, ang tulo mga residente sa Sitio Bombil sa Barangay Gairan, Siyudad sa Bogo.
Ang tulo gibuhian human napamatud-an nga gikolekta ra nila ang mga medikal nga basura nga nagkatag ug gibalik kini sa sako./ Necolyn Claire Balansag, CNU Intern, Trixcy Shien Cobarde, Benedicto College Intern, ug Jeanette Arinque, HNU Intern