Nasikop ug nabalhog sa prisuhan sa Naga City Cebu Police Station ang usa ka ulitawo nga nangatang sa dan nga kalit nigakos sa usa ka ginang ug gitulis sa Purok Talong, Barangay Tuyan, alas 6:30 sa gabii, Dominggo, Agusto 25, 2024.
Tungod sa tawag gikan sa usa ka concerned citizen, ang kapulisan sa Naga ubos sa kamandoan ni P/Lt. Col William Homoc daling nitubag sa alarma hinungdan nga nasikop ang suspek nga si 'Renato', 27, ug ulitawo.
Ang biktima giila lang sa kapulisan sa ngan nga 'Sally Jane', 49.
Sa imbestigasyon sa kapulisan nasayran nga ang biktima ang naglakaw padulong pauli sa ilang balay apan kalit lang nibabag ang suspek ug nigakos sa biktima.
Sumala sa mga saksi, gisampungan ang baba sa biktima ug giilog ang bag niini nga may sud nga cellphone apan wa matino nga kantidad sa cash ug uban pa.
Ang suspek nasikop sa hot pursuit sa kapulisan ug nakuha gikan sa posisyun sa niini ang nabilin nga kuwarta nga P800. / DVG