Drugas ang usa sa gitan-aw nga motibo sa pagpusil sa usa ka ginang nga fish vendor niadtong Sabado sa kaadlawon sa Sityo General Genis, Barangay Sawang Calero, dakbayan sa Sugbo.
Ang biktima nga naa na sa luwas nga kahimtang giila nga si Junabel Torreon, 44, nagpuyo sa Block 7, Sawang Calero apan lumad nga taga Brgy. Duljo Fatima.
Naigo ang biktima sa tuong kamot apan nilapos kini sa iyang tuong dughan apan giingong nakalingkawas na sa tino nga kamatayon.
Matod ni Police Maj. Francis Renz Talosig, hepe sa Sawang Calero Police Station, nga base sa nakuha nila nga CCTV footage, ang wala pa mailhing armadong lalaki nagsul-ob og jacket nga dunay hood ug naka-face mask ug daling nisibat human sa pagpamusil.
Sigun sa mga saksi nga sa pag-abot sa maong lalaki, naningil, matod pa, kini sa utang sa biktima apan pipila ka gutlo ang nakalabay gipusil na dayon ang ginang.
Gituohan nga utang sa ilegal nga drugas ang gipaningil sa armadong lalaki human nibutyag ang bana sa biktima nga usa ka kargador sa Cebu City Fish Port nga tiggamitan sa ilegal nga drugas ang iyang asawa.
Gawas nga mogamit nig ilegal nga drugas, mobaligya usab kini base sa pamahayag sa mga nakaila niini sa Duljo Fatima.
Apan matod ni Talosig nga ila pang subayon ang mga nakuha nga kasayuran pinaagi sa pagpalawom sa ilang imbestigasyon.
Ang biktima dunay 12 ka mga anak ug ang gisaligan lang sa ilang panginabuhian mao ang pagpamaligya og isda samtang ang bana kargador.
Dugang ni Talosig, dunay nakamay-ong sa panagway sa namusil. / AYB