Ginang giputla'g ulo, 2 ka kamot

Ginang giputla'g ulo, 2 ka kamot
■ GIUNAY: Wa nay ulo ang biktima nga si Gomersina Deniega Avenido, 75, nga gitabunan og tarpaulin sa may kalibunan sa Barangay Basdiot, Moalboal, human tigbasa sa suspek nga si Reno Arcelo Tereso, 36, nga gipapuyo sa luna biktima apan nasuko nga papahawaon kay gamiton ang lugar. Estorya sa pahina 2. / MOALBOAL POLICE STATION
■ GIUNAY: Wa nay ulo ang biktima nga si Gomersina Deniega Avenido, 75, nga gitabunan og tarpaulin sa may kalibunan sa Barangay Basdiot, Moalboal, human tigbasa sa suspek nga si Reno Arcelo Tereso, 36, nga gipapuyo sa luna biktima apan nasuko nga papahawaon kay gamiton ang lugar. Estorya sa pahina 2. / MOALBOAL POLICE STATION

Napunggot na ang ulo sa 75 anyos nga biyuda sa dihang napalgan sa kalibunan sa Barangay Basdiot, lungsod sa Moalboal, habagatang kasadpang bahin sa lalawigan sa Sugbo, niadtong Lunes sa hapon, Marso 4, 2024.

Ang biktima giila nga si Gomersina Deniega Avenido, kinsa nakaangkon og mga samad tinigbasan samtang ang iyang duha ka mga kamot nagkawilkawil na lang sa pulso.

Napalgan sa iyang kabanay ang lawas sa biktima nga nagbuy-od nga gitabunan na lang og tarpaulin.

Samtang ang suspek nailhan nga si Reno Arcelo Tereso, alyas Butyok, 36, ulitawo, nga gipapuyo sa biktima diha ra sab sa iyang gipanag-iyang luna.

Dali ra sab siya nga nadakpan sa dihang naabtan sa kapulisan nga nagpaabot og bus nga kasakyan sa Poblacion East, Moalboal nianang gabii sa maong adlaw human siya gitumbok sa usa ka saksi.

ALAD SA BABOY

Nasayran sa pakighinabi sa SunStar Cebu sa usa sa mga pag-umangkon sa namatay nga sa miaging tuig pa buot papahawaon sa biktima si Tereso, kinsa gipapuyo sa luna sa yuta ni Avenido.

Ang suspek nagtukod og barongbarong sa may alad sa baboy sa biktima, apan gikinahanglan nang gamiton ang alad kay mamuhi og baboy si Avenido alang sa kapistahan sa maong dapit.

Ilabi na nga naandan na ni Avenido nga maghikay matag pista nga nagsilbi niyang panaad matag tuig, apan nagmagahi sa pagpahawa si Tereso.

“Si Tiya didto pa ni’s amoa anang dayung paniudto kay nipalit og lechon manok kay ga lechon man akong papa og manok para baligya. Paghuman seguro to niyag paniudto, gapasilong sa kanding. Didto siyas luyo sa may alad dapit, unahan kay gapasilong sa mga kanding,” asoy sa iyang pag-umangkon.

NAPALGAN SA KALIBUNAN

Ang laing pag-umangkon sa biktima nangita kaniya nianang hapon kay wa kini sa iyang balay, apan nakit-an nalang sa kasagbutan nga nahay-ad ug unang gituohan nga giatake sa kasingkasing.

Sa pagwalis sa pag-umangkon sa gitabon nga tarpaulin diha sa lawas sa biktima, nalisang siya sa iyang nakita nga wa na kiniy ulo.

“Silingan man jud mi. Naa siyay (suspek) something (naay deperinsiya sa panghunahuna) nga ig storya niya mag imagine siya’g mga butang,” sugilon sa pag-umangkon sa biktima kalabot sa suspek.

Gikompirmar usab kini ni Police Captain Claudio Gaco, hepe sa Moalboal Municipal Police Station, nga nahinabi sa Superbalita Cebu sa Marso 4 sa gabii.

Matod niya nga nitumaw sa ila usab nga imbestigasyon nga nasuko ang suspek sa biktima kay papahawaon na siya.

Giangkon usab kini sa suspek sa pag-imbestigar ni Gako, nga ang nakaingon sa iyang kasuko kay kanunay siyang sultihan nga papahawaon sa luna.

Giingon nga nagkaabot ang duha sa umahan ug didto nahitabo ang krimen.

Matod niya nga dali nila nga nasikop si Tereso human siya gitumbok sa usa ka saksi.

Wa say lain nahibaw-an nga dunay kasuko sa biktima, ang suspek ra. Ang lawas ni Avenido gipa-cremate na lang sa mga anak. / Dugang taho ni Claudine D. Flores

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph